Apple電動車 – 2020年12月31日

年尾寫下Apple電動車，趕搭潮流尾班車，Apple都唔執輸話攪電動車谷下股價。不過Tim Cook乜野級數睇左咁多年都知啦。

Apple攪電動車係會攪到，不過full self driving係5年內係冇可能做到既事。5年後Tesla可能已經玩到full self driving既火車，船，單車，飛機或其他交通工具。至於FSD既火箭就可能誇張左少少。大約等多10年啦。

點解FSD咁緊要？因為好多人覺得學車，考車，泊車好煩囉，俾少少錢，全自動好抵丫。咁點解除左Tesla其他咁多廠都做唔到FSD？主要係因為Tesla儲左10年數據，將所有車既路面經驗結合再去做。

連AI強如Google都因為成日用訓練車，唔用真車收數據，所以攪左咁多年影都冇。當然如果Google同大車廠如Toyota拍檔收集駕駛數據，咁等多3-5年都應該有作為。但如果繼續用訓練車收集數據，咁就注定失敗。

咁至於Apple做一架好靚既EV有冇吸引力呢?咁老實講都一定有吸引力。但如果想自動駕駛，中短期內選擇只有Tesla。自動接送細路返學，幫你載客搵外快，自動去超市收貨，放工飲醉左送你返屋企，慢慢車已經超越科幻小說，變成生活好幫手。

其實Tim Cook想超越Steve Jobs有小小似香港隊想攞世界杯冠軍差唔多，發夢發大左。但係，如果俾錢買晒最勁嘅球員入籍代表香港又唔係冇得打。例如Apple俾錢用Tesla既FSD都一樣得架。自己整唔到未買囉。好合理。Tesla賣FSD無本咁滯，因為已經投資晒，幾多人用都係俾咁多錢，多出黎用既人收既錢係白賺。好過扎鐵賣車賺雞碎咁多。所以Tesla賣FSD俾Apple或其他車廠用絕對有可能。Win win！