世界盃神話 – 2022年12月19日

世界盃完美落幕，我最鍾意既阿根廷同日本都表現極之出色，睇到熱血沸騰。

首先日本足球小將式贏德國再贏西班牙，絕對係精彩，底線救球再入波比睇漫畫仲好睇。如果你係睇足球小將漫畫大既人，一定會比呢兩場比賽感動到。令人對夢想重拾希望。日本人睇一定睇到喊。

另一場有史以來最刺激既決賽由阿根廷對法國。自細一睇波就睇馬勒當拿上帝之手。再睇佢一個人走全場過6、7個人。細個嘅時候就當左佢係偶像。連帶鍾意阿根廷。可惜後來佢吸毒。阿根廷一路都浮浮沉沉。巴廸斯圖達，奧廸加，華朗等好球員亦帶唔返起隊波。直到美斯好似球王咁出現，巴塞乜波都贏，但返阿根廷後都係冇乜表現。馬勒當拿亦離開世界。直到美斯最後一次世界盃既最後一場比賽由佢帶領阿根廷3-3打和法國再12碼捧盃。感覺好似由馬勒當拿到美斯既阿根廷隊捧盃，極之夢幻，經歷世界上最完美既一場球賽。