BNO英國租樓收回按金秘技 – 2021年12月28日

英國第一次做租客即遇無良經紀同業主，間屋好多問題，垃圾又唔清。

攪左一年，最尾佢地做左10%左右。90%都係頂唔順自己做或者俾錢換左。

一年後要搬走，唸住好黎好去，成間屋清潔晒，有問題既野整好晒，成間屋好靚仔交番比經紀同業主。

點知過左一星期都唔退按金（英國法律規定最多收5星期租做按金，千祈唔好做水魚問業主使唔使預收一年租）。打電話去問，經紀話業主話花園唔靚仔要扣350鎊按金。差啲想少佢祖宗十八代。不過黎英國要扮斯文人，而且本身我都極少爆粗。於是好有禮貌同佢地講以前一地垃圾唔執，又雜草叢生，我交樓已經清潔好晒再加剪草。再補埋之前叫佢做野但唔覆既電郵，再加埋搬入時同搬出時照片對照。點知個經紀面皮厚過鬼。話業主唔肯，最平收200鎊。頂唔順，終於好含蓄地爆佢樽。

拖拖拉拉左兩個月都唔退錢，跟住我話要法庭見，一樣冇反應。話約業主當面傾，經紀都唔理。最後唸起按金放係deposit protection scheme。於是問下佢地。跟住佢地俾左份tenant statutory declaration form。叫我搵律師宣誓交返俾佢哋。如果業主有唔同意見要14日回覆同交證據，佢地睇雙方證據後決定，如果冇回覆就自動退錢俾租客。最後比左20鎊律師宣誓，14日冇回覆，收錢。總結成單野唔知係業主玩野定經紀想收兩家維修費。

想收返按金重點貼士：

1. 按金放deposit protection scheme
2. 搬入前影大量照片
3. 如有問題第一時間電話及電郵通知經紀或業主維修，要留紀錄
4. 搬出時影大量照片
5. 據理力爭