由舊年開始大量BNO湧入英國,但大部分人準備不足,可能會多交額外稅款。本人並非專業稅務顧問,純粹分享個人經驗。有需要人士絕對應該搵專業稅務顧問幫手。
有讀者電郵問點係IB報稅。其實最好既方法係唔使報稅。當你未到英國時,絕對應該已經開好英國戶口走資,將所有將來會係英國要用既錢轉晒去英國,包括賣樓,賣股票,賣保險,賣bitcoin等等。咁樣英國稅局係冇任何方法將以上既海外收入或資產增值收稅。如果你打算長期居住英國,又唔會走,又唔會四圍去,咁呢個方法最clear cut。
又當如果你打算係英國留6年,攞左英國passport後會走,係英國又冇收入。咁可以用non domcile既remittance申報海外收入。只要錢留係海外,所有海外收入同海外資產增值都唔會收英國稅。以上方法最多可以用7年。之後再用個charge會好貴。
當你有英國收入,又想投資。買股票最好開英國ISA戶口,戶口入面賺既錢完全免稅。每人每年最多可入2萬鎊新資金。
當你有收入,又想買英國樓收租,咁係英國開SPV有限公司,用公司名義買樓收租。可扣減公司使費,例如買車,入油,同客食飯,比利息,買西裝,等等,總之公司相關使費可扣稅。但要留意有限公司每年相關費用。其他方法仲有Trust同pension,比較冷門,遲啲有機會再講。
假設你人已經到左英國,但錢未轉去英國。咁要轉錢去英國前要特別小心。由海外轉去英國既錢有機會比英國政府收稅。例如你香港有銀行或股票戶口,只要裡面既錢係你到達英國後有收入。咁已經係mixed fund戶口。理論上除非你可以證明到全部都係到英國之前既收入。如果唔係英國政府就有權收稅。一般人要解釋得清楚真係唔易。詳細操作我未試過,亦唔想試。所以我到英國後,基本上冇匯錢入英國。
咁有稅務條例,只要你跟住個遊戲玩,交少啲稅係完全合法既。例如你係英國每年居住少過90日。再去英國稅局網站做測驗。你有機會連稅務居民都唔係,咁自然交少好多稅。例如我之前去愛爾蘭,識左一對法國夫婦,佢哋每年係英國,法國,愛爾蘭同摩洛哥每度地方住少過90日,咁大部分既稅都免左。前提係你有咁多錢,唔使做,四圍玩。
另外一啲合法既方法係家人獻金。例如父母或親朋好友,如果佢哋比錢你,係可以合法入英國同免稅。當然你係唔可以係香港比番港幣佢哋,因為咁樣稅局會覺得係匯錢入英國而唔係禮物。仲有送錢人7年內唔可以死,否則有遺產稅。
再睇返依家英國已經離開左EU。你既錢入EU既銀行係冇問題既。可以去EU消費。或現金每次帶1萬鎊等值入境。而最近英國既EU國家係南愛爾蘭同法國,搭船,火車,揸車或廉航。型啲去瑞士滑雪都得。同以前係香港去台灣或上廣州差唔多。不過依家Omicorn出入都唔方便。
講稅講多10日10夜都講唔完,最緊要都係低調地合法。千祈唔好做任何違法行為。至於讀者問既IB報稅教學會下次出。
發佈留言
很抱歉,必須登入網站才能發佈留言。