2021 年 5 月 12 日

美股投資頻道

#投資 #美股 #債券 #REITs #期權 #物業 #優先股

歐洲雜談 – 2021年4月5日

uk

唔經唔覺係歐洲住左半年,再加埋以前斷斷續續既時間加埋都超過一年。襯復活節假期冇市,又寫下關於歐洲嘅文章。

其實歐洲真係唔細,多民族,多文化,而且全部歷史久遠。

首先睇生活習慣,普遍歐洲人都生活樸素簡單。除大城市外,主要娛樂係煮飯,食飯,傾偈,玩音樂,唱歌,睇書,跳舞,跑步,戶外活動。香港人要融入當地社會應該唔太難。當然有時對話中有好多話題同歷史,文化等等有關,一開頭都要啲時間先可以理解。

講到煮餸一定法國最叻,簡單既材料都會用好多心機去整。有句話係living to eat最適合佢地。另一句eating to live就比較適合英國多啲。整體上,歐洲煮野用好多唔同香料。麵包,芝士差唔多度度地方都好食。海鮮係比較少。烹調方法多煎,焗,慢煮,比較少蒸,炒。都常唔會好似香港人食一餐飯有5-6個餸,最多係一個main,有時加個甜品。

另一方面,小鎮生活係大部分歐洲國家都比大城市安全,人都更加友善,物價亦唔比一大截。

至於整潔,整體比亞洲差少少。垃圾,狗屎比較多。而跟據觀察法國人最唔注重清潔。但諷刺係佢地啲香水,化妝品最出名,簡單解讀係注重表面多啲,唔係真實性格鍾意乾淨。

揸車方面,比香港人禮讓,但高速公路行140-150公里都唔係咁特別。德國仲係無限速。棍波絕對主流,又平又多款。

財政方面,歐洲人唔多儲錢,稅重,所以真正有錢人比例唔高。不過歐洲人都有人情味,見到有需要既人好多時都會主動提出幫助。

歐洲以前都經歷唔少戰爭,難得有歐盟帶黎和平。另外血統上其實混血極度普遍。所以恩怨情仇有時分唔得咁清。同埋好多人都係歐洲大陸唔同地方出世,讀書,做野,所以最後都係撈埋一堆。仲有未去英國前成日有印象英國人係gentlemen,但歐洲人睇法係覺得英國人成日醉酒鬧事。

政治上,英國,愛爾蘭,北愛爾蘭,蘇格蘭,歐盟既出路好複雜多變。蘇格蘭獨立有壓倒性市民支持。Catalonia都差唔多。法國大革命,愛爾蘭獨立戰爭,到近期烏克蘭/加泰/法國黃背心,全部都有極強反抗意志同覺悟。所以歐洲係唔係可以有好長久既和平係有變數。不過好彩係近代歐洲人都傾向公投和平解決問題。

最後,歐洲文化,歷史,繪畫,建築,文藝,音樂,宗教等等真係令人大開眼界。有機會同有時間真係可以睇到好多係香港睇唔到既野。

0 0 votes
Article Rating
0
Would love your thoughts, please comment.x
()
x