HSBC

匯豐血的教訓 – 2020年4月2日

雖然匯豐唔係美股,但係有美國ADR預託證券,都算半隻美股,再加呢度有一半網友都係香港,好多人關心匯豐,所以今日會講一下。但我重申一次,我極之睇淡香港同大陸股,已清倉好耐。

20年前出黎做野第一隻買既股票係CTI 1137(即係依家黃維基隻HKTV Mall),第2隻買既係匯豐。後來入左匯豐做野,成屋企人都覺得好威,有個仔入到匯豐做,25日大假,起碼14個月糧,有Options,買樓息平到爆,借100倍月薪。買賣匯豐股票同期權一路賺錢,淨期權一個月賺一萬幾千,好景時去到賺3,4萬一個月。一路到2008年蝕左啲,但整體上係匯豐既投資都係賺。

至到後來匯豐投資美國失利,同自己轉左大部份投資去香港同日本房地產,所以好少買賣匯豐。但整體上匯豐既光環好明顯一路消失緊。

作為客戶用左Premier十幾年,最後都係舊年downgrade返做advance。時代變,但匯豐仲當自己係龍頭,不思進取。大家睇下個exchange rate spread,閑閑地2-3個%,人地IB個spread 0.001左右,匯款收charge又幾舊水,對比下transferwise或者之前講既IB Monzo互通甚至免費(當然有限制係先轉自己名下戶口後再要轉多次),匯豐2-3日先有錢到,人地半個鐘到一個鐘有錢收,匯豐網上個介面超難用,手機又有啲功能冇,人地啲app全部幾個制攪掂。到你去分行排隊,條premier仲長過去政府睇街症(肺炎前),最後次次都係自己downgrade排返advance。外國人好多已經習慣手機app唔去排隊。

又講下炒股,基本上匯豐淨可以買賣港股,基金,或少量美股。個市一大啲上落就慢晒甚至死機。佣金貴到冇朋友。基金比外國ETF貴好多。你想玩下美股期權,對唔住冇。仲有乜鬼存倉費。想玩債券最少買廿萬美金仲要攞多一球美金開private bank。IB一萬美金開戶,仲有埋leverage借錢,玩乜都有,債券入場費低好多,個system快到一㩒就得。匯豐連車尾燈都望唔到。

信用卡同樣情況,exchange rate差再加手續費,要sms confirm去旅行冇roaming又收得工。對比Monzo debit卡一次差3-4%,用匯豐卡買左平野都蝕返比信用卡。

Mortgage好保守,買多一間屋或要加按,全部查你祖宗18代。比錢佢賺都要受氣。

又講下存款保障,香港政府包50萬港元,英國Monzo包85000英鎊,即係大約80萬港元。

又返番公司營運,早幾個月幾個高層包括CEO, Chief Compliance Officer一齊早。當然匯豐一定話正常調動,不過短時間咁多人走仲有compliance,一啲都唔平常。

到琴日,再因英國要求唔派息,雖然唔可以全怪匯豐。但近十幾年既積弱絕對同管理能力有關。十幾年都解決唔到既問題,我唔會信俾多3幾年會攪得好。大家再闊啲睇埋國泰航空,利豐,思捷,全部香港昔日既皇牌都末落。咁升左啲乜?騰訊。有時除左錢,維護香港自己既品牌更加重要。只要做好服務,最好品牌,創新科技,生意同利潤會自然送上門。反思,如果破壞左公平既制度,市場由人為操控,沉醉響自己渾水裡面既小魚池,這個地方還有希望嗎?做人如是,投資如是。


已發佈

分類:

作者:

留言

在〈匯豐血的教訓 – 2020年4月2日〉中有 4 則留言

  1. 「so ling」的個人頭像
    so ling

    破壞左公平既制度,市場由人為操控,沉醉響自己渾水裡面既小魚池,這個地方還有希望嗎?做人如是,投資如是。

    1. 「投資者」的個人頭像
      投資者

      同意,雖然世界冇完美既市場,但要投資都搵個少啲人為操控,比較公平嘅地方先好投資。如果唔係終有一日乜都冇晒。

  2. 「S k y」的個人頭像
    S k y

    Hsbc股票個收费係超貴,和要存倉費。

    匯豐持住食老本,大把香港客!

    D人唔怕/唔驚匯豐會執笠

    1. 「投資者」的個人頭像
      投資者

      好多人都跟唔到時代既步伐,覺得匯豐百幾年歷史唔會有事。不過依家好明顯匯豐所有優勢已經冇晒。再加上佢哋政治零分,被時間淘汰係遲早既事。

發佈留言