2021 年 9 月 19 日

美股投資頻道

#投資 #美股 #債券 #REITs #期權 #物業 #優先股

錢多到使唔晒既煩惱 – 2020年7月30日

money

踏入40歲以後,開始有錢多到使唔晒既煩惱。簡單講就係收入長期多過支出。特別係2020年,受疫情影響,使錢機會更加少。

係40歲前,收入主要係收租物業,工作同埋投資。開支大部份去左衣食住行,小朋友教育。以前都有買嘢既欲望,例如相機,音響,IT gadgets,去下旅行,潛水,滑雪,間中出去食下好野。其實當時都開始覺得好似搵錢快過使錢。

跟住後來冇做正職,今年開始賣樓,收入主要係淨返既樓同投資。收入總數係少左,但係因為疫情,開支減得仲快,冇晒娛樂咁滯,旅遊冇晒,買野都買少左好多,小朋友補習或課外活動都停咗。

另一個因素係年紀大,使錢既欲望都細左。衫褲唔會成日買新款,食嘢都係食有營養既野,唔使一定食貴野。如果之後去英國住,住屋又慳左錢。再唸下,到你50,60歲既時候,跟本比錢你都冇用。年紀大,除左醫療費用,其他既地方真係冇乜錢使。所以好多有錢佬死之前用唔晒既錢都係捐晒,不過我覺得好多「慈善機構」唔係真係幫人,多數係搵食。

又有人好怪,會使好多錢令自己煩惱,例如每月使好多錢迫細路仔學野,攪到細路仔好大壓力又學唔好。或者唔係個style又得登買名牌著。其實我自己覺得使錢既目的係減少煩惱同埋令人開心。如果使左錢會令自己仲煩,不如唔好使。使錢既藝術在乎於用最少既錢得到最大既快樂。其中幫人係可以令人達到快樂既目的。

所以有時見到啲朋友差唔多年紀,又有啲錢,我都好鼓勵佢地做多啲自己想做同有意義既事。使錢既同時其實幫到人幫到經濟。梁錦松有一句金句,使左既錢先係自己既。因為香港人好似一定要有錢先有安全感,有時問佢哋要搵幾多先夠,好多時都答唔到。如果成世人一路都淨係掛住搵錢,又唔識使錢,咁其實搵錢冇乜意義。