MPF有入冇出 – 2020年6月19日

如果要全面撒退，MPF都應該要攞走埋。以前都講過MPF既不合理性，超高收費同埋負數回報。名正言順係一個吸血系統。

最近走去攞MPF，由於有幾個戶口，要每間都去申請。一如所料，慘過CUT有線。除左要去民政處宜誓離開香港。匯X話移民大陸就一定唔俾你攞MPF，跟住就算你去到外國唔可以住親屬屋企，要自己租屋或買居，跟住又要俾佢睇一輪先回水。跟住我問點解返大陸住唔比攞錢，跟住匯X就話積金局指引，跟住搵積金局就話由銀行個別安排。

到搵信X，都差唔多，好少少，大陸如有樓可攞錢。不過呢個時侯我唔知有幾多天才仲夠膽揸大陸樓。

個跟本問題係啲供款係我既，積金局同銀行有乜權唔俾我攞返？就算話移民先準攞，點解移民大陸唔攞得？跟住移民去外國點解唔可以住朋友或親屬屋企，點解一定要買屋或租屋？

一連串既問題無論銀行或積金局都係互相射波，我叫佢攞條法例比我睇，佢地話冇。香港人既MPF凍過水。