2021 年 9 月 19 日

美股投資頻道

#投資 #美股 #債券 #REITs #期權 #物業 #優先股

油價負數連鎖反應 – 2020年4月23日

explode

我一路唔睇好油價,不過從來冇唸過油價會變負數,有D似俾錢叫人掉垃圾。

新聞話主要係儲存地方唔夠,而期貨要實物交收,所以到期前個個搶住俾錢走人,冇人想收實油,因為實油要提煉先可以當除氣油用。同埋開採石油無論要停止或開始都有DELAY,唔同屋企閂水喉就得。

至於儲存地方唔夠唔應該係世界性問題,因為俄羅斯,中東,美國中部都大把地。正常推測係局部地區問題。仲有岩頁油要停係比石油容易。

未來世界可能淨返幾間大既油公司(始終政府都會救佢哋),細既好多都要執。另外,匯豐借錢比油公司已經輸好金,不過未有耐爆完,仲有幾多貸款比油企?其他銀行點?國泰年年炒輸油都唔係新聞,不過今次超金,再加肺炎,使唔使盡快用晒所有ASIAMILES?俄羅斯等錢洗但跌成咁會唔會破產?債主點算?IB有客炒輸油,一日要代客補8800萬美金,仲有幾多brokers要補錢?油公司借既寫字樓,貨倉,船隊等等有冇租交?要炒幾多人?好多時,油價大跌睇落好似唔關大家事,但實際好多公司,銀行,生意拍檔,親戚朋友都會受巨大影響,最後每個人都要付唔同程度代價。

所有問題都冇答案,是旦一樣都係大大獲既野。當唔知最壞情況將會幾壞時,千祈千祈千祈唔好唸住搏反彈。

雖然之前預測到肺炎已經見頂,但美國開工真係唔夠快。越嚟越多人出黎示威要回復正常生活係好事。因為唔開工比中肺炎更恐怖。再拖2個月唔開工,真係同世界末日差唔多,大家準備食樹皮。

2020年過左1/3已經咁多百年一遇,甚至歷史上從來未發生既大鑊野,依家美金同黃金都未必最安全。最安全應該係搬去瑞士山區住,用太陽能,自己種菜,飲山水,自己打獵。現實同電影條界線越嚟越唔清楚。