人棄我取 – 2020年9月14日

投資其實係人棄我取遊戲。最近移民前一路賣野，好多熱門貨好多人搶，好快賣晒。傢俬就相反，由於運輸安裝成本，賣2手傢俬係難好多。

無論你買返黎既傢俬幾萬蚊都好，到要賣時，幾百蚊都賣唔到，甚至免費送都要搵好耐先有人要。

不過係外國，原來好多人執舊傢俬，翻新完賣得好貴。因為舊傢俬有個性，特別設計同有歷史。當然，要賺錢既前題係識搵特別嘅貨，識翻新，同埋知道點搵買家。

股票都係，有啲股票有壞消息長期大跌，跌到送都冇人要。但如果本身行業有前境，有個識改善公司既CEO，過一段時間公司既價值會大大提高。

有邊啲CEO做到以上既野？第一個唸到都係Elon Musk，有innovation同execution。但公司最壞既時期已經過左，所以依家俾錢買既係半完成品。另一個好例子就係王維基，當然我已經唔投資香港。咁揀CEO除左睇往績，好多時如果你做嗰行就會知邊啲CEO做公司做得好。或者揀啲大機會成功既CEO。風險回報好多時都成正比。一個係人都知係好既CEO，股價已經大幅跑贏。但要賺最多就係投資係有潛力既CEO同公司。

另一樣就係睇evidence。例如睇緊既係Workhorse，如果做到UPS張合約，咁應該proven左間公司既車係work既。