2021 年 9 月 19 日

美股投資頻道

#投資 #美股 #債券 #REITs #期權 #物業 #優先股

我的房地產投資之路 – 2020年4月13日

property

香港KOL(如coco哥,皮老闆,大J,止凡,火燎森,starman)大都越來越睇淡投資香港房地產.我既睇法係房地產投資以前絕對係香港投資既主流,但大約7-8年前已經大不如前,係1-2年開始已經步入死亡倒數.

係2000年買入第一間物業,200萬350呎實用,港島新樓有會所.當年父母叫買就買,冇乜唸過點解買.當年$15000人工,供樓$9000.直到2003年SARS,最平得返128萬.後來覺得供樓壓力大,又咁岩睇投資既書,所以就開始租層樓出去,一個月收返$9000當搵租客供樓.之後識個同事月入5萬,但揸住廿層樓成億貨.再仔細打聽學左佢既方法開始投資房地產(簡單講都係loop loop loop哈哈).

係2005年到2012-13年,一路買賣香港樓,有同佳哥交過手,亦聽過一D波叔既事跡,攪過劏房,考過地產大牌,開過地產鋪,再2013年進軍日本樓.自己擁有過既樓大約30間.期間買賣100%賺錢.依家揸住既樓減左以前既租金收入後全部免費.

不過自從政府乜稅物稅後,我已經冇買香港樓,再加按揭信貸資料庫,按息增加同槓桿大大減低,政治環境大不如前,所以都係慢慢減持.另一方面,Interactive Brokers(IB)係香港普及,投資REITs有更大槓桿,減低過份集中風險,更加靈活同容易快速增加流動性,同埋稅務優惠.

對於上一代投資者,房地產的確令好多人致富.但好大程度係因為香港吸收左大陸既”資金”.同一時間,香港人因為住既支出亦長期高據世界第一.當然高樓價補貼令搭地鐵平左,但遠遠不及在住屋上及因租金帶來物價上升而增加既開支.