2021 年 9 月 19 日

美股投資頻道

#投資 #美股 #債券 #REITs #期權 #物業 #優先股

英國一週 – 2020年10月4日

uk

其實以前都係英國住過一段時間,不過今次移民係有啲唔同。最後去左英國中部既一個小鎮,揸車去莎士比亞出世既地方應該唔係好遠。今次同大家分享下英國既第一週。

用BNO既LOTR入境超容易同方便,比地址電話後大約等20分鐘就走得。出年1月1號可以申請BNO VISA,等6年之後就變英國人。不過我覺得好大機會唔使等6年都會直接轉英國passport比你。

一去到就住間河邊airbnb,好靚。跟住近續2日睇樓,由朝睇到晚。同一時間聯絡學校同council繼續入學申請。跟住好快就決定左租邊間屋,下星期搬。學校亦好快收錄左。中學仲大過香港既大學。不過費事同搬屋撞期,所以等多一星期先返學。學校淨係要求自己買校服,唔需要買書。同時間申請緊校車。

個小鎮環境好靚,有河,有樹,有花園,有橋,有教堂,淨係附近行下都覺得好舒服。附近有間香港人外賣,去吹過下水。每日去超市買食物,其實好多野都好平。以前係香港好易肚屙,黎到可能食物乾淨左,未試過肚屙。

衫褲好casual就得。千期唔好著得靚。香港人求期一個賣左間樓揸住一千萬黎英國,已經屬於好有錢既人。應該用錢做多啲charity,如果用黎買靚車買靚衫showoff,好容易引起壞人注意。

車亦都好平,我自己打算買架二手日本車代步就算。但如果你鍾意BMW,Benz,Porsche等等。真係萬幾蚊港紙已經夠買部二手玩。歐洲車迷天堂。

至於投資,英國稅重,但係有投資ISA戶口,比你每年入2萬鎊免稅投資。都唔錯。買樓我自己唔會,但都可能適合其他朋友。美股我都冇乜時間睇,不過就算Trump中招都冇大跌。不過個市場錢多,真係冇地方吸咁多錢。我繼續睇情況大跌時分段買最大幾隻科投股同ARK。我仲有好多現金未入市。